అకృత్య చక్రవర్తి - క్లాడియస్ సీజర్ అగస్టస్ జెర్మానికస్ అనే పూర్తి పేరు కలిగిన నీరో!

అకృత్య చక్రవర్తి

ఓ పక్క రోమ్ నగరం కాలి బూడిదైపోతోంది. ఇంకోపక్క నీరో చక్రవర్తి ఫిడేల్ వాయించుకుంటూ కూచున్నాడు. ఇది చాలు నీరో ఎలాంటి వ్యక్తో చెప్పడానికి! నీరోకి కళలంటే తగని మక్కువ. విచ్చలవిడితనం ఎక్కువ. నీరో ఓ వైపు సంగీతకారుడు. మరోవైపు క్రూరుడు. సమర్థ నాయకత్వ లక్షణాలున్నాయి. కాని వాటిని పట్టి ఉంచుకోగల బుద్ధి విచక్షణ లేదు.

ఓ పట్టాన అర్థం కాని వ్యక్తిత్వం నీరోది. జవాబుల్లేని ప్రశ్నలెన్నో నీరో జీవితంలో! 30 యేళ్లు మాత్రమే జీవించినా - రోమన్ చరిత్రలోనే కాదు, ప్రపంచ చరిత్రలోనే సంచలనం సృష్టించిన చక్రవర్తి - క్లాడియస్ సీజర్ అగస్టస్ జెర్మానికస్ అనే పూర్తి పేరు కలిగిన నీరో!


నీరో పొడగరి కాదు. ఒంటి నిండా మచ్చలు. ఎప్పుడూ శరీరం నుండి ఏదో భరించలేని వాసన. రాగిరంగు జుట్టు. నీలం రంగు కళ్లు. అవి కాంతిలేని గాజు కళ్లకు నకళ్లు. పైగా కొద్దిగా మెల్ల. మెడ కొంచెం మందం. పైకి పొడుచుకు వచ్చిన పొట్ట. సన్నని కాళ్లు. దేహంలోని ఏ భాగమూ స్ఫుటంగా, తీరుగా ఉండవు. అయినా ఏదో తెలీని ఆకర్షణ, అందమూ!

నీరో అచ్చమైన కవి. సిసలైన గాయకుడు. బాణీలు కట్టి మాటల్ని పాటలుగా అల్లిన సంగీతకారుడు. లైర్ అనే వాద్య పరికర తంత్రుల్ని మీటుతూ రాగామృతంలో మునిగిపోయిన భావుకుడు. నాట్యం చేస్తూ ఊగిపోయిన ఉద్రేకుడు. నటుడు. తనలోని కళల్ని నలుగురికీ చూపించాలని తపించేవాడు. రసజ్ఞుల చప్పట్లకై మురిసిపోయిన అమాయకుడు. 

కాని వేదిక ఎక్కాలంటే మాత్రం తెగ భయం. సభాకంపంతో చాలాసార్లు ప్రదర్శనల్ని రద్దు చేసుకున్నాడు. చివరకు తెగించి క్రీ.శ.64లో 27వ యేట నియోపాలిస్ పట్టణంలో తొలి కచేరీ ఇచ్చాడు - అదీ చక్రవర్తి అయి ఉండి! ఆ రోజు వేలాది ప్రజలు నీరోని హీరోగా ఆరాధించారు. 

పాలకుడిగా కూడా మంచి మార్కులే పడతాయి నీరోకి. పేదలకు పన్నుల భారం తగ్గించాడు. అవినీతిని అరికట్టాడు. నైలునది పుట్టుకను తెలుసుకునేందుకు ఎంతో ఖర్చుపెట్టి పరిశోధనా యాత్రలు ఏర్పాటు చేశాడు. కాలువలు తవ్వించాడు. జిమ్‌లు, థియేటర్లు కట్టించాడు. ఖడ్గయుద్ధ ప్రదర్శనల్ని ఏర్పాటు చేశాడు.

రోమన్ అయినా గ్రీకు సంస్కృతి అంటే మాత్రం నీరోకి చెప్పలేనంత ఇష్టం. గ్రీకు భాషను ధారాళంగా మాట్లాడేవాడు. వస్త్రధారణలో గ్రీకుల్ని అనుకరించేవాడు. ఒలింపిక్స్ తరహాలోనే రోమ్‌లో కూడా నిరోనియా అనే పేరుతో క్రీడోత్సవాల్ని అంబరాన్ని తాకే సంబరంగా జరిపేవాడు.
గ్రీసు దేశంలో జరిగే ఒలింపిక్స్‌లో పాల్గొనాలని తహతహలాడేవాడు. బోలెడన్ని బహుమతులు గెలవాలని ఉబలాటపడేవాడు. సంగీత పాటవ పోటీల్లో ఎలాగూ తానే గెలుస్తానని తెలుసు.
రథాల పోటీలో కూడా విజేతగా నిలవాలనుకున్నాడు. అక్కడేమో పది గుర్రాల్ని పూన్చిన రథాన్ని నడపాలి. తనకేమో ఒక్క గుర్రం మాత్రమే ఉండే రథాన్ని నడపడమే తెలుసు. కఠోర సాధన చేస్తుండగానే ఒలింపిక్స్ క్రీడలొచ్చేశాయి. దాంతో అధికారులకు మూడో కంటికి తెలీకుండా లంచాలిచ్చి రెండేళ్లు వాయిదా వేయించాడు. అంతలో దశాశ్వ రథ చోదనంపై పట్టు సాధించాడు.

చివరకు క్రీ.శ.67లో ఆ పోటీల్లో పాల్గొన్నాడు. అన్నింటిల్లోనూ విజయమే పొందాడు. రథ చోదనంలో మాత్రం చాలాసార్లు కిందపడ్డాడు. చావు తప్పి కన్ను లొట్టబోయింది. అయినా అందులోనూ గెలిచాడు. ఘనమైన రోమ్ చక్రవర్తి స్థానంలో ఉండి ఏకంగా 1800 గ్రీకు పతకాలు సాధించాడు.

ముగింపు వేడుకల్లో గ్రీకుల్ని ఉద్దేశించి ఉపన్యసించాడు. ఆ ఆవేశంలో, ఆనందంలో గ్రీకులకు అనేక రాయితీలు ప్రకటించేశాడు. అది కాస్తా రోమన్లకు ఆగ్రహాన్ని కలగజేసింది. అప్పటికే కళాపోషణలో పడి ప్రజారక్షణ, సంరక్షణ మరిచిపోయిన నీరోని రోమన్లు జీరోని చేశారు.
ఎన్నో ఉత్తమ గుణాలున్నప్పటికీ నీరో కథ విషాదాంతమవడానికి కారణం - అతని తల్లి అంటే ఆశ్చర్యం వేస్తుంది.

నీరో తల్లి అగ్రిప్పినా. తన కడుపున క్రీ.శ. 37 డిసెంబర్ 15న నీరో పుట్టిన నాటి నుంచి ఆ పిల్లాడు రోమ్ చక్రవర్తి కావాలని కలలు కంది. అగ్రిప్పినా అసాధారణ అందగత్తె. తెలివైనది. దురాశాపరురాలు. ఎంతకైనా తెగించే హింసాప్రవృత్తి ఆమెది. అధికార దాహం మెండు. ఆమెకు కుడివైపు పై దవడలో రెండు కోరపళ్లున్నాయి. అది అదృష్టమని రోమన్లు నమ్ముతారు.
భర్త గ్నాయెస్ డొమిటెస్ అహెనో బార్బస్‌తో ఆమె కొంతకాలమే కాపురం చేసింది. 

తర్వాత మరొకర్ని పెళ్లి చేసుకుని వెంటనే వదిలేసింది. తన పుత్రుణ్ని గద్దెనెక్కించేందుకు మార్గాల్ని అన్వేషించింది. అప్పటికి సింహాసనంపై క్లాడియస్ ఉన్నాడు. అతనెవరో కాదు - అగ్రిప్పినాకు పెదనాన్న. అతణ్ని చేసుకుంటే - వారసుడిగా తన కొడుకుని రోమ్ చక్రవర్తిని చేయొచ్చు. అంతే. వెంటనే క్లాడియస్‌ను పెళ్లి చేసుకొంది. అతనికి నాలుగో భార్యగా వెళ్లడానికి ఏమాత్రం వెనుకాడలేదు. తనకు అతగాడు మూడో జతగాడు కదా. పర్లేదు!

తన కొడుకు రేపోమాపో చక్రవర్తి అవుతాడు. అయితే సరిపోదు. నిలబడాలి. శాశ్వతంగా చక్రం తిప్పాలి. అలా జరగాలంటే ఎక్కడ నొక్కాలో చెక్కాలో మొక్కాలో తొక్కాలో తెలియాలి. అందుకోసం సెనెకా అనే ప్రత్యేక రాజగురువుని నియమించింది.
రాజనీతిపై గట్టి పట్టున్నవాడు సెనెకా. చక్రవర్తి క్లాడియస్ మేనకోడలు జూలియా లివిల్లాతో వివాహేతర సంబంధం మూలాన రాజదర్బారు నుంచి బహిష్కరణకు గురైనవాడు సెనెకా. అలాంటి వాడికే తెలుస్తాయి - కుట్రలూ కుతంత్రాలూ.

అలాంటి గురువు చేత - 10 యేళ్లు కూడా నిండని నీరోకి, రెక్కలు ఎదగని కోమలుడికి, కళలంటే పిచ్చి అభిమానమున్న బాలుడికి, మార్దవుడికి - కర్కశత్వాన్ని, కాఠిన్యాన్ని, అధికార లాలసను నేర్పించడం మొదలెట్టింది అగ్రిప్పినా! పిల్లల్ని మార్కుల కోసం చెండాడే నేటి తల్లుల్లా!!
ఏడేళ్లు ఎదురుచూసింది అగ్రిప్పినా. 

నీరో మేజర్ అయ్యాడు - ఆనాటి రోమన్ సూత్రాల ప్రకారం చక్రవర్తి అయ్యే వయసుకి వచ్చాడు. ఓ శుభదినాన భర్త క్లాడియస్‌ను అగ్రిప్పినా చంపించింది - పుట్టగొడుగుల్లో విషాన్ని కలిపి! కొడుకు చక్రవర్తి కావడానికి రాచమార్గం వేసింది. క్రీ.శ. 54 అక్టోబర్ 13న 17 యేళ్ల నీరో పీఠాన్ని అధిరోహించాడు.

కొడుకు చక్రవర్తి అయ్యాక చక్రం తిప్పాలనుకుంది అగ్రిప్పినా. కాని అనూహ్యంగా ఆమెకు అడ్డం పడ్డాడు సెనెకా. సవతి సోదరి క్లాడియా ఆక్టావియాతో నీరోకి పెళ్లి చేసింది అగ్రిప్పినా. వావి వరసలు లేని ‘అగమ్య గమనం’ అనే వివాహాలు నాటి రోమన్లకు సంప్రదాయమే! కాని వైవాహిక జీవితం అంతగా సంతృప్తినివ్వలేదు నీరోకి. దాంతో పనిమనిషి క్లాడియా ఆక్టేతో అక్రమ సంబంధం పెట్టుకున్నాడు నీరో. తన స్నేహితుడు ఓథో భార్య పాపియా సబీనాతోనూ ఇలాగే ప్రవర్తించాడు. 

మొదట్లో తల్లి మాట విన్నాడు నీరో. క్రమంగా నువ్వెవరివి అని ఎదురు ప్రశ్నించాడు. రాజగురువు సెనెకా నీరోకే మద్దతిచ్చాడు. దాంతో అగ్రిప్పినాకు ఒళ్లు మండింది. సొంత కొడుకని కూడా చూడకుండా నీరోని గద్దె దింపాలని పంతం పట్టింది. నీరోకి సవతి సోదరుడైన బ్రిటానికస్‌ని చక్రవర్తిని చేయాలనుకుంది. కాని ఆ కుర్రాడు మేజర్ కాబోవడానికి ముందురోజే చనిపోయాడు. కాదు... కాదు... నీరోయే చంపించేశాడు.

దాంతో అగ్రిప్పినా తోక తొక్కిన తాచుపామయింది. పాలనా వ్యవహారాల్లో మునుపటికి మించి తలదూర్చింది. చివరకు నీరో ఆమెను హత్య చేయించేదాకా కథ ముదిరింది. మూడుసార్లు తల్లిపై విషప్రయోగం చేశాడు. ఆమె ఇంకా తెలివైంది! విరుగుడు ఔషధాన్ని సేవించి బయటపడింది. ఓసారి ఆమె ఓడలో మునిగిపోయేలా చేశాడు నీరో. బతికి బట్టకట్టింది. చివరకు తల్లినే ఉరితీసి ఆత్మహత్యగా చిత్రించాడు నీరో! నీవు నేర్పిన విద్యయే నీరజాక్ష!!

క్రీ.శ. 64 జూలై 18. రోమ్ నగరం తగలబడిన రోజు. ఆగ్నేయ మూల బాణసంచా మూలాన రాజుకున్న రవ్వ క్షణాల్లో దావానలమైంది. ఇళ్లు, భవంతులు అన్నీ బూడిద కుప్పలయ్యాయి. నగరాన్ని నల్లటి మేఘాలు కప్పుకున్నాయి. వరసగా ఐదు రోజులు మంటలే మంటలు. నీరోయే ఈ అకృత్యానికి కారణమని అంతా అనుకున్నారు. డోమస్ ఆరియా అనే మహా అద్భుత రాజప్రాసాదాన్ని నిర్మించేందుకు నీరో ఈ దారుణానికి ఒడిగట్టాడంటారు.

అగ్ని కీలలు ఓ పక్క అలుముకుంటున్నా... నీరో మాత్రం ‘లైర్’ అనే వాద్యాన్ని వాయించడంలో మునిగిపోయాడు. సాక్ ఆఫ్ ఇలియం గీతాలాపన చేశాడు. ఆనాటికి ఫిడేల్ ఇంకా రూపొందలేదు. లైర్‌ని ఫిడేల్‌కు పూర్వరూపమనవచ్చు. మంటలు కాస్త తగ్గాక, నీరో సహాయ చర్యలకు పూనుకున్నాడు విచిత్రంగా! శిథిలాల కింద చిక్కుకున్న వారిని తానే స్వయంగా తీశాడు. క్షతగాత్రుల్ని రక్షించాడు. తన రాజ ప్రాసాదంలో ఆశ్రయమిచ్చాడు. ఆహారమిచ్చాడు.

అయినా ప్రజలు నమ్మలేదు. నీరోయే దోషి అన్నారు. సెనెటర్లు నీరోపై కత్తికట్టారు. అధికారం కోసం అర్రులు చాచిన వారంతా ఏకమై నీరోపై కక్ష కట్టారు. నీరోలోని విశృంఖలత్వం ప్రజాకంటకుడయ్యేందుకు కారణమైంది. చేపల్ని పట్టేందుకు బంగారు తీగల్ని ఉపయోగించేంత భోగత్వం; తల్లిని, భార్యను, చివరకు గురువు సెనెకాను సైతం హతమార్చిన క్రూరత్వం; నిత్యం స్త్రీలతో సరసాలాడిన లాలసత్వం - వెరసి నీరోని ప్రజలు అసహ్యించుకునేలా చేశాయి. చివరకు నీరో క్రీ.శ. 68, జూన్ 9న ఆత్మహత్య చేసుకునేలా చేశాయి. నీరో పలికిన చివరి మాటలు - ‘‘ఎంతటి అసహ్యకర జీవితం నాది. నాలోని కళాకారుడూ చావక తప్పదే!!’’

మొదట్లో తల్లి మాట విన్నాడు నీరో. క్రమంగా నువ్వెవరివి అని ఎదురు ప్రశ్నించాడు. రాజగురువు సెనెకా నీరోకే మద్దతిచ్చాడు. దాంతో అగ్రిప్పినాకు ఒళ్లు మండింది. సొంత కొడుకని కూడా చూడకుండా నీరోని గద్దె దింపాలని పంతం పట్టింది... నీరో తల్లి అగ్రిప్పినా